FACE博
玩Candy Crush學人生道理
新年啱啱過咗，今年成班親戚送禮轉咗送心心？哦！原來係Candy Crush入面嘅心心！呢個遊戲風靡全香港，搭車、食飯都見到個個垂低頭係咁玩，仲要周圍叫朋友又送心又送飛，都咪話唔過癮！網友Stanley Chui就話，玩呢個遊戲都可以學到8個人生道理，例如好多人都成日卡關，佢就話「難關經常有，只要別放棄，總會過」，仲話「想放棄時，看看走得比你前的朋友，人家過得了，你還擔心甚麼？」最後仲加番句「記住關關難過關關過」。
正所謂遊戲如人生，估唔到玩個遊戲都有咁多道理！(長氣電波)
浸大無視港人簡體字招生
香港浸會大學經歷過特首民調、國教風波同「香港藍皮書」後，已為人詬病，質疑大學係咪染紅。近日又有網民爆料，話浸大嘅碩士廣告全用簡體字同英文，無視本地學生咁話！唔單止廣告傳單，就連研究院官方網頁都只係提供英文同簡體字，hkttf專頁「福街與林忌創作」就狠批浸大，話一間香港嘅大學竟然摒棄傳統正體字，一心吸納大陸學生，不如改名做「中國浸會大學」啦！
又係嘅，啲名店就話為咗吸金先用簡體字做招徠，但堂堂一間高等教育學府都咁樣做，究竟係想辦學定做生意呢？(長氣電波)
玲玲一席話，勝讀十年書
有電視媒體請來堪輿學家麥玲玲，以面相角度分析國際形勢，話朝鮮危機已全面破解！原來因為金正恩嘅耳好貼面，反映佢一定會遵從長輩從前制定嘅路線，可見朝鮮今後都唔會作出改變，一則「世事都給麥玲玲師傅看透了。勝讀十年書啊」嘅視頻分享喺網絡瘋傳，對此有網民不禁感慨：「國際危機不解自破了....!以後讀國際關係一定要加入玄學!」
亦有網民建議擴大分析範圍：「有冇分析習總隻耳仔貼唔貼」，有網民對此不置可否：「有冇講到金生佢阿媽係唔係女人？可能啟發性同創新性會大啲…」，有人建議玲玲可以「做國師兼做欽天監」，並期待新一輪嘅深度分析：「咁講到核試場地風水未?」唔通國際時事新聞娛樂化？(雲尼拉)
http://metrohk.com.hk/?cmd=detail&id=205312
