我同表弟細細個就一齊喺同一個球會學打波，由於我學波時間早過佢，技術自然好過佢
表弟係嗰啲好天真又帶點稚氣既人，成日撩我打汽水，輸咗又唔服，衝穿我一兩球又要擺pose
我地好fd，逢星期五喺球會練完波就一齊食宵夜，佢又帶我去唔同球局打波同介紹啲波友俾我識
平時佢都成日約我打波，又會上嚟我屋企玩同叫我教佢做功課
其實有時我都已經喺Facebook或者WhatsApp答咗佢啦，不過佢都仲要上嚟，上到嚟又唔係問功課，都係想我陪吓佢啫
大約四、五年前，由於佢讀書又唔太好，打波又去到樽頸位，無乜大進步，俾意見佢又唔聽，我咪成日寸佢激勵佢囉
佢成日俾我寸到扁晒嘴、成塊面紅晒，不過依然都係成日搵我
佢去比賽依然會叫我做場外指導
我有一排大學啲course要夜晚上，佢連續好多個星期五晚晚call我叫我陪佢打波食宵夜
我去做gym佢又跟埋去，但每次都只係用跑步機，仲要俾成30鈫非會員價(後來我知道原來佢每日得40鈫零用錢)
有時一睇手機，成幾個missed call，原來又係我表弟call我
可能我寸得佢太多，有時又寸得太盡，佢搵我而我唔得閒時對佢態度又唔好，有一次寸完佢之後佢就真係嬲我，仲話想打我
自從嗰次開始，佢就嬲咗我喇，對我態度完全唔同咗，仲周圍喺啲朋友面前講我壞話唱衰我
我條氣唔順，所以咪見佢一鑊寸佢一鑊囉，就咁我哋單單打打咗幾個月
不過咁，始終佢都係我表弟，又係我最好既朋友之一，我都想同佢friend番
喺佢生日時我就送咗塊膠俾佢氹番佢，咁啱佢過兩日要比賽又想換膠喎，佢就嗰日即刻將塊膠貼咗上板
我又同佢做番好朋友一、兩個月喇
直至......
可能佢平時成日講人壞話，喺學校得罪人多，啲同學喺forum開post鬧佢
佢諗都唔諗就話個post係我開，仲同晒全部朋友咁講，搞到我受千夫所指
有啲人信到佢十足，自然就覺得我衰到無人有，啲朋友開始疏遠我
喺球會練完波之後佢仲私下WhatsApp其他人撇甩我去食宵夜而唔預我
我當時覺得好委屈，好無奈，但點解釋我表弟都唔肯聽，想氹佢又唔受
我嬲起上嚟有時就同佢火星撞地球咁，成日因為小事大吵，佢連球會都轉埋嚟避我
幾個月後，表弟佢知道咗個post唔係我開，但可能之前吵得太多喇，佢依然好嬲我
佢又唔肯交代番件事還我一個清白喎
其實我都好計較既，我就同其他朋友迫佢要出面澄清番
最後佢迫於無奈、好唔情願下逐個逐個向每個佢唱衰過我既朋友交代番件事
由嗰刻開始，表弟就唔想再理我喇，佢直頭block晒我所有嘢，例如電話、Facebook同WhatsApp
我完全同佢溝通唔到
去我姨媽屋企佢就即刻出街，喺街遇到佢就即刻跑走
姨媽叫我俾啲空間佢冷靜吓
哩四、五年嚟，我都唔敢成日搵佢
每年佢生日時，我都會托姨媽送份生日禮物俾佢，但佢都無收
有時喺體育館咁啱遇到，我哋就喺隔離枱各自同朋友打波而無交流
喺街見到面就你眼望我眼然後扮唔識
過年我去到姨媽屋企拜年佢一係就匿喺房，一係就話要出去
佢讀完high dip之後就要去外國讀書喇
今個月我試過搵朋友約過佢幾次，但佢都唔肯出嚟
其實咁多年嚟一直失敗我都好唔開心同好嬲
噚日嬲嬲地喺體育館見到佢講咗啲好hurt佢既說話，我睇今日真係收唔到科喇
佢就嚟去英國喇，我可能嚟緊幾年都無乜機會再見到佢喇
唉，今日真係好難過，所以上嚟寫篇文抒發吓，多謝大家花咁多寶貴時間睇
有時間既話可以留言鼓勵吓
[ 本帖最後由 peterchantt 於 2019-5-13 17:04 編輯 ]
