我球技好差,但喜歡寫嘢,也鍾意周圍打,走勻香港九龍新界球局,為答謝貓兄,也為興趣,小弟今日起,在此分享一下球局打球的所見所聞和趣事
比賽過後,小休一天,繼續練波,今日係連續第三日,比較特别係,今日同2位新球友打球,一男一女
球局5人2枱,在歌街,中午冒著寒風冷雨,由九龍塘站行上條斜路,其實都幾難頂,嗰度當風,遮都差D吹翻
昨日有球友問,歌街部升降機整好未,話畀大家知,整好咗啦!上4樓唔駛逐層行得咁辛苦
言歸正傳,今日首先同位女球友練習,呢位女球友曾經跟名師學藝,高我三班,我呢D戊组水平,冇學過波,難得有一位受過正統訓練嘅人肯免費教,幾凍都要去啦
佢教我反膠正手正確打法,我一直知道自己姿勢唔正確,所以打得唔穏、連續又不好,大人打波,最麻煩係壞習慣早已入咗腦,好難改,佢叫我手臂要定,拉球三點鐘去十二點位,手腕要鬆,但同時唔要亂擰,打球要識包住個波,咁球就會穏,先練均速,做到再退後一步去起板,手唔要拉得太後,會慢,除要向上拉,因為唔係拉下旋,我資質差,未完全做到,之後會再練,真係獲益良多
識我嘅人,都知我改用長膠冇耐,3個月貨仔,仲練緊,女球友早前亦換咗一面長膠改打法,但横板同直板唔同打法,我拱擺閘為主,佢就閘加削,各有特色~
今日有一位另新球友,用日直粒仔,配背面反膠横打,發急球好衝,尤其直線有一手,我長膠最弱係接急球,正好去練,初時易下網或冒高,情況就好似早兩日比賽,對手放急球再攻,我接得多,漸漸適應了,雖未做到每一下都可以擺短,但已經可以大概1/3得,若果唔能擺短,就嘗試放佢不易起板的方位,打白界,算係另一方法,感謝這位球友的指教~
我仍在天天進步~
[ 本帖最後由 jimmych 於 2018-2-4 22:46 編輯 ]
