Board logo

標題: [綜合技術] 如何對付直板開兩大角急球, 跟住正手攻或拉另一大斜線? [打印本頁]
作者: johnli    時間: 2018-2-14 23:37     標題: 如何對付直板開兩大角急球, 跟住正手攻或拉另一大斜線?

我是右手橫板以拉波為主打法, 多板數相持來回比較好. 想請教如何應對以下一位右手直板打法(注:佢反手弱過正手好多?

1.  對手開急長球去我反手位, 我多數反手拉佢反手位.  因為拉佢正手直線, 拉出界機會大過拉反手位.  但佢會側身快攻或快拉一板直線去我正手位.

2.  對手開急長球去我反手位, 我多數反手拉佢反手位.  但佢會側身快攻或快拉一板斜線去我反手位. 我拉佢正手位, 佢亦拉我反手位.

以上兩種套路, 因為太快, 所以救不到.  根本未去到相持已經輸左.
作者: 青見人    時間: 2018-2-15 01:10

既然對手係開急衝長球到你反手位，何不快推斜直線？
1 你選擇以拉球回接，相對回球時間會長咗，拉球動作亦容易讓對方判斷你回球的線路。
2 可選擇回對方反手角或橫檯位，從而收窄對手回球線路。

[ 本帖最後由 青見人 於 2018-2-15 01:13 編輯 ]
作者: friendlybrother    時間: 2018-2-15 02:37

引用:
原帖由 johnli 於 2018-2-14 11:37 PM 發表
我是右手橫板以拉波為主打法, 多板數相持來回比較好. 想請教如何應對以下一位右手直板打法(注:佢反手弱過正手好多?

1.  對手開急長球去我反手位, 我多數反手拉佢反手位.  因為拉佢正手直線, 拉出界機會大過拉反手 ...
假設對手係傳統直拍單面攻打法，反手弱，冇橫打。

佢青一色開急長球到你反手位，可能已經知道你反手位弱。

你也青一色全部拉回對方的反手位，可能你認為佢反手弱，所以咁做，但係你的做法，已經被識破，佢側定身預備用正手攻擊你。參考雅典奧運會決賽王皓對柳承敏，就係王皓認為柳承敏反手弱，所以清一色回球到佢反手位，柳承敏明知王皓球球都係咁，所以側定身用正手反衝。

解決的方法好簡單，就係你回球必須要有變化，不要清一色，對手是單面攻，好想強行側身搶攻，你就間中突襲正手位，搞亂佢進攻的步法。急長球係可以用彈擊回球，或者用細動作的反手弧圈球（以前臂及手碗發力，不要用大臂）輕輕的磨擦回對方的反手小三角位（睇佢步法有幾醒）及間中變線到直線正手位令佢狼狽撲右。你也可以間中退後一兩步，削回一個重下旋球，睇下佢拉唔拉到。你手感好的話，甚至可以用減力擋閘回一個近網短球比佢歎。

拉直線怕出界，你自己都知道原因係直線比較短，所以拉直線要平時練習一下，拉直線的時候要減少撞擊比例，增加壓住波頂磨擦的成份，手碗輕輕的向前一磨，就能高產生上旋，保證有安全弧線，個波可以曲墜落到台，並且有第二速，個波反彈突然飈向前及急速下沉，對手就不容易回球啦。

不過，若果你的技術水平不支援上述技戰術的運用，你唯有老老實實的提升基本功，然後再算吧。

[ 本帖最後由 friendlybrother 於 2018-5-22 16:03 編輯 ]
作者: johnli    時間: 2018-2-15 08:56

多謝各師兄指點, 我試下先.  我係兩面反貼膠配五夾純木.  其實急球要磨波頂拉返去, 係唔係拉波最高點,或之前, 或之後拉會好D, 安全D?
作者: garytang2018    時間: 2018-2-15 09:19

對方不是正膠，那純粹快攻一定是以弧圈取勝。他發長球到你反手位，應該是端線前的位置?這個是橫拍唯一弱點，無論搓或拉都無法用力，反觀直拍可推可搓，這樣讓你先拉起，他可以加力推或者側身拉。其實你接時可以變線，上旋來就彈他正手，下旋來就擰去他正手，拉開打直拍處下風……
作者: friendlybrother    時間: 2018-2-15 09:37

引用:
原帖由 johnli 於 2018-2-15 08:56 AM 發表
多謝各師兄指點, 我試下先.  我係兩面反貼膠配五夾純木.  其實急球要磨波頂拉返去, 係唔係拉波最高點,或之前, 或之後拉會好D, 安全D?
拉上升期要求太高，一般業餘球迷係做唔到的，失誤太多就唔好，拉下降期又太慢，太遲出手，而且比個波彈太過長及出台太多，你拉過去冇乜威力，所以最佳時機應該係拉最高點或剛下降期。

[ 本帖最後由 friendlybrother 於 2018-5-22 16:03 編輯 ]
作者: 金擇魚    時間: 2018-2-15 12:56

以上兩種套路, 因為太快, 所以救不到.  根本未去到相持已經輸左.

通常呢種戰術係搏殺份比較大,如果你既對手一開局就咁打(高級街波),根本冇套路可言,你唯有見波打波
而佢又覺得你回球既質量唔高,D波比得佢咁舒服,就梗係發力啦,
如果你習慣由短球下旋打起.慢到快打起,而對手一開始就前三板上手,你會好唔適應,
首先你要點檢視一下自己既接發球搶攻能力,其次就防守能力,再就防守轉攻能力,
係自己發球段打穩自己節奏,堅持自己既戰術,對手覺得你有波,就唔會胡亂搏殺,後面既波你自己會知點打.
你接發球位置可後一點,但要有接正手短既準備,也可以參考佢同高手既比賽
切忌落後時用高質量既回球,同用報復心態去跟對手去搏殺,以免增多無謂失誤,如果唔係,對手就會覺得你(好易打)
作者: johnli    時間: 2018-2-15 14:24

got it with many thanks, 若望兄.

[ 本帖最後由 friendlybrother 於 2018-5-22 16:03 編輯 ]
作者: johnli    時間: 2018-2-15 14:25

引用:
原帖由 金擇魚 於 2018-2-15 12:56 發表
以上兩種套路, 因為太快, 所以救不到.  根本未去到相持已經輸左.

通常呢種戰術係搏殺份比較大,如果你既對手一開局就咁打(高級街波),根本冇套路可言,你唯有見波打波
而佢又覺得你回球既質量唔高,D波比得佢咁舒服, ...
被師兄講中晒.
作者: johnli    時間: 2018-2-15 14:28

引用:
原帖由 garytang2018 於 2018-2-15 09:19 發表
對方不是正膠，那純粹快攻一定是以弧圈取勝。他發長球到你反手位，應該是端線前的位置?這個是橫拍唯一弱點，無論搓或拉都無法用力，反觀直拍可推可搓，這樣讓你先拉起，他可以加力推或者側身拉。其實你接時可以變線， ...
多謝師兄指點, 我最希望拉開打, 但現在第3板已被KO.
作者: friendlybrother    時間: 2018-2-15 17:26

唔使客氣。

補充一點，一個比賽，係包括：接發球搶攻及發球搶攻。

好明顯，對手知道你怕急長球快波，所以故意針對你這個缺點去發急長球比你，由於你不可能阻止對方發這樣的球，在目前階段，你也不可能看見我們的教路而立即可以接好佢啲急長球。

當輪到你發球，你就要儘量發揮發球搶攻去追回分數。你明知自己怕快波，所以你不要發太多急長球同佢鬥快，你要儘量減慢速度。對手是傳統直拍單面攻，你可以多發有轉冇轉下旋近網短球到對手的反手位，阻止佢發力進攻你打快波，除非佢識台內擰拉，佢單面攻打法，頂多只能搓回給你，你是橫拍兩面弧圈型打法，你要把握兩面弧圈搶拉的機會，不要和他鬥快，以拉慢加轉弧圈球為主，他的反手位頂多用推擋被動回球，你連續拉死佢。

然後再發一個剛剛不出台的下旋球給他正手位，引誘他撲向右邊調動他用正手起板，由於有下旋及介乎出台與不出台之間，對方不可能發力打死你，你立即回球他反手位大空擋，你就可以解決他了，這是對付單面攻打法常用的有效戰術，叫做引右打左。

[ 本帖最後由 friendlybrother 於 2018-5-22 16:04 編輯 ]
作者: johnli    時間: 2018-2-15 20:32

你講得好岩.  對手直板係以正手為主.  佢反手冇檯內擰, 出台橫拉, 成攻率都係最多一半.  我90%都發係下旋球, 要練下不轉同出台不出檯球.  對手係力量型, 希望一板KO, 好似樓上金師兄所講, 同佢鬥力報復, 已試, 唔得, 因為我根本唔係打呢個節奏.  想今年練好發球, 接發球.  多謝指點.

[ 本帖最後由 friendlybrother 於 2018-5-22 16:04 編輯 ]
作者: alanchan    時間: 2018-2-15 23:26

引用:
原帖由 johnli 於 2018-2-14 23:37 發表
我是右手橫板以拉波為主打法, 多板數相持來回比較好. 想請教如何應對以下一位右手直板打法(注:佢反手弱過正手好多?

1.  對手開急長球去我反手位, 我多數反手拉佢反手位.  因為拉佢正手直線, 拉出界機會大過拉反手 ...
雖然很久無同你打, 我自己的感覺係, 你的對手開得沖球, 就意味著跟你對攻.

所以問題係你接發球時, 比對方可以起大板打你, 你回球的質量唔多唔少有D問題.
1. 你說你拉, 但我相信你的接發球出手不可能係很轉很重的上旋, 對方上旋沖球, 根本你無機會拉手睇停停一下磨擦出高轉的上旋, 因為通常高轉的上旋(高吊), 在對方發半出檯下旋時, 你有機會在下降期由下到上合力擦才有機會的.
2. 對方上旋沖球, 比較有效而簡單的係向前"彈" 一板, 比一個有突然性的球速比番對手, 壓縮對手的回球時間(他也無時間打大板)
3. 對方上旋沖球, 我相信你只係擋一板比較多(而不是什麼拉), 因為你個對手側身又夠時間, 打又得拉都得, 証明佢大把時間點玩都得的感覺. (除非對面係乜乜乜又甲又乙又冠又亞又乜龍又乜東, 你就當我無講過啦)

好回歸番正題, 我同你都打過, 你比我的感覺就係接發球不會變, 企位次次貼到張檯實一實, 短球不快的也無乜事, 一長你根本無時間接.
我相信你個對手一見你個企位, 十個有九個都開長球, 就如很久之前在校長球局個少少肥的妹妹仔, 6成都係長球少少下旋去你中間位一樣.

所以, 接發球時, 睇一下對方開什麼球比較多, 如長球多, 是否向後退一點點比多一點空間時間自己出手, 又或者你自己是否企得太太太太直, 所以反手沒有空間(板同腹部之間的位置), 又或者反手收碗動作有改善空間, 等等等等等等等等等

自己REVIEW一下自己, 拍一下自己的片吧.


我也係新手中的新手,魚腩中比較肥美,人人都可以大炒我,有自己REVIEW而改善不了的新手

[ 本帖最後由 alanchan 於 2018-2-15 23:30 編輯 ]
作者: skyline@@    時間: 2018-2-16 21:45

Thx sharing
作者: johnli    時間: 2018-12-23 17:48

引用:
原帖由 alanchan 於 2018-2-15 23:26 發表


雖然很久無同你打, 我自己的感覺係, 你的對手開得沖球, 就意味著跟你對攻.

所以問題係你接發球時, 比對方可以起大板打你, 你回球的質量唔多唔少有D問題.
1. 你說你拉, 但我相信你的接發球出手不可能係很轉很 ...
就快一年了, 依家同佢5:5波.  兄台講得好岩,篇文睇左好多次.  你比我更了解自己弱點.  站位後退半步至一步已經對接佢急球好有幫助, 因為多左時間準備.  另外, 間中接反手球推佢正手直線已經幫助.  加上樓上金兄所言不同對方搏殺, 已經少左好多無謂失誤.  多謝各位指點 .  



歡迎光臨 香港乒乓網 (http://hkttf.com/) Powered by Discuz! 6.0.0