香港乒乓網 - Powered by Discuz! Board

標題: 真係用教波搵食。。。。 [打印本頁]

作者: lmichael 時間: 2017-10-25 21:43 標題: 真係用教波搵食。。。。

大家都知我老鬼，講明，我雖然有教練牌，教過隊，但全部義務，趁現在機場捱緊巴士返將軍，講下真係教波搵食，講下歷史，大家，特別係後生仔，真係考意清楚。
乒乓球教練牌，乒總有左好多年，但以前，其實無咩用，因為其實搵唔到食，最多part time 去社區中心教波，我記得真正教波開始搵到食，要數到2002,03年左近，第一間，開宗明義應該係乒乓世界，當時經濟唔好，租金平，佢地租左灣仔一個閣
仔教波，呢個閣仔有個落地玻璃窗對住行往入境處人來人往既天橋，所以好多人都知，咁真係好多搵佢地教，當時兩個老板我都識，都係名將，2002係咩野年代？係搵食艱難年代，失業率好高，佢地檔野，真係搵到錢，唔止搵到食，咁後來，好多人失左業，當時真係裁員裁到人心皇皇，就教波，又真係好多人比仔女學多樣野，以便搵學校，係2008個段時間，真係乒乓球知既黃金時代，唔止教，仲開埋球館，唔止失業教，連大學畢業都教。。。，不過教波又真係搵到錢，我識個教練，教左國內香港幾層樓。

但自從乒乓球由興趣變左搵錢工具後，武林就從此多事了，拖糧，少事一宗。吞埋你股份，好朋友反目，男女朋友分手，連恐嚇都發生過。。。。
當年乒乓球黑暗年代，其實只係兩間球會，雅健同匯俊，當時搞手真係為與趣，邊有咁多黑暗野？
如果你一畢業就全職教波，真係想清楚，教波唔係無成本，其實你係用緊你既青春，教波唔係一個資歷，你做會計十年，係資產，搵工會易左，教波十年係負資產。。。，而且行頭窄，是非又多。。。。
條龍翔道巴士震到打唔到字。。。唔打啦。

[ 本帖最後由 lmichael 於 2017-10-25 21:45 編輯 ]

作者: 金擇魚 時間: 2017-10-25 23:18

萬達,許素虹,早乒乓世界幾期啦
天橋個位前身係健身中心,後來勁加租,
真正第一個黃金時期,係2004香港奧運雙打銀牌開始
青少年,同成人,有成績既仲有恆達.

作者: 金擇魚 時間: 2017-10-25 23:24

1988,年左右
崔小燕,廖福民,已係萬達教波
廖福民應該係偷雞咁教

作者: grizzlyhk 時間: 2017-10-25 23:58

引用:

原帖由 金擇魚 於 2017-10-25 23:24 發表
1988,年左右
崔小燕,廖福民,已係萬達教波
廖福民應該係偷雞咁教

黃耀榮都有响萬達教

作者: 苹果 時間: 2017-10-26 00:06

全职教波真係唔易，現在又好多國內教練過來，香港乒壇越來越黑暗

作者: HKSpurs 時間: 2017-10-26 00:52 標題: 人生哪怕吹乒乓許素虹（2007年報導）

走進許素虹開設的乒乓球訓練中心，滿地都是橙色的乒乓球在滾動，只見幾個小學生在練習正手抽擊，來來回回數十板也不會落網或出界；不時又有年過四十的西裝友，走進更衣室換上球衣，然後對住自動發球機苦練削波。

　　「隻眼唔好周圍望，專心，又唔記得扭條腰啦！」對住心散的小朋友，許素虹經常嗌到聲沙。

　　提板征戰，曾連奪七屆香港乒乓球女單冠軍，從來無大傷患，反而三十歲退出乒壇，開學校做教練輾轉十多年，由朝教到黑，卻傷了聲帶，要開刀切除息肉。

　　「睇住小朋友，由初初打滴滴仔，到埋學界冠軍，我就開心。

　　「我希望可以磨練到佢鬥志，好多小朋友太幸福，未經歷過辛苦。乒乓波球速好快，幾秒之間就要面對成功同失敗，又會學到點睇人（對手）面色，估人心理。」

　　難怪富豪闊太都愛把子女送上門，交由她訓練鬥心，許世勳、廖創興、李國寶等家族成員都是她的客仔，連朱玲玲大公子霍啟剛都自小跟她學乒乓球。

　　「佢細個肥嘟嘟，好得意口架！我中華遊樂會教佢打波，佢媽咪（朱玲玲）冇乜點出現，不過次次都會有四個工人跟住，企四個角落，負責幫佢執波；學一段時間，佢就無再學。」

　　反而立法會主席范徐麗泰的兒子，從小學五年級已開始跟許素虹學打波，學了兩三年便奪得校內乒乓球比賽冠軍，令范太十分高興，索性自己也報名打埋一份，藉此鍛煉體能。

　　「佢好低調唔想公開，我只可以講佢係一個好聽話學生，我叫佢跳，佢就跟住跳，反應好快。平時佢個仔練波，佢次次都會坐側邊陪住，等個仔落堂。」

　　馬浚偉清場練波

　　許素虹說，有時是看電視或報紙，會發現學生的爸爸媽媽上鏡，才知他們是乜乜富豪物物家族，但無論是名人或街坊客仔，她都劃一收費，每小時私人教授都收約四百，過去十多年來從未加價，即使是前特首夫人董趙洪娉也一視同仁。

　　「早幾年董建華老婆個秘書打畀我，話『董太想學打乒乓波，你有無興趣教佢？』佢要我去佢度上門教波，但佢又無乒乓波檯，咁我就建議不如去我個中心度打啦，董太派個秘書睇過，可能覺得地點唔多方便，之後傾傾就無下文。」

　　今年四月，藝人馬浚偉拍攝TVB8的星級音樂王特輯，跟乒乓孖寶高禮澤和李靜對打時，他自爆乒乓球啟蒙老師正是許素虹。

　　「佢前年開始跟我學，正手推擋反手削波都好全面，佢一個禮拜學兩次，每次打兩個鐘，我主力教佢抽波，佢好快上手。」

　　有無明星架子？「無！佢打得差時又唔會發脾氣，只係『唏！唏！』咁樣激勵自己。佢學波就鍾意清場打，唔想畀人望住，我就同佢經理人講，邊段時間會冇乜學生，就叫佢就時間學啦！」

　　訪問這天，記者遇上息影女星兼前港姐崔嘉寶，帶兒子前來學波，許素虹笑臉上前招呼，沒有特別的阿諛。

　　「我淨係知以前電視見過佢，但叫咩名又唔係好記得。」她說自己性格雖然爽直，但不愛應酬打關係。

　　

　　緣慳國家隊

　　這也難怪，出生於印尼的許素虹，本身便是含金鑰匙而來，父母是印尼華僑，在當地經營布疋和手表批發，白手興家成華人富商。

　　「我十兄弟姊妹都自細鍾意打乒乓波，個年代屋企有張乒乓波，環境算係唔錯。」

　　但好景不常，到她七歲時，印尼開始排華，許父更成為追殺目標，惟有舉家移居大陸；誰知又碰上文化大革命，她一家人輾轉流落到惠州市華僑農場生活，許父由印尼富商一下子變為耕田勞動分子，許素虹更是半日讀書半日耕田，練就今天的刻苦性格。

　　「到我九歲，學校舉辦乒乓球比賽，我就靜靜雞偷家姐塊板去參加，第二名，之後再代表學校參加公開比賽。」

　　兩年後她被挑選加入廣東省隊集訓，四十名隊員中最後會淘汰剩六人做省代表，她苦戰至排第六剛好入選。

　　之後她首次參加全國少年乒乓球賽第八，翌年再戰得第三，更獲當時國家隊教練孫梅英點名大讚：「呢個女仔可以重點培養！」

　　人生猶如乒乓球，這一球抽擊得手，下一球卻往往推落網失分輸波。當許素虹正準備代表中國出征亞洲少年賽，卻遇上偏頭痛困擾，一準備比賽就嘔，日日要打止痛針。

　　「醫生話Ｘ光片顯示我腦裡面有一點但又唔係生瘤，而我血管天生比常人窄，所以唔去得北方寒冷天氣生活，結果眼白白睇住第二個隊員頂我個位去比賽。

　　「後來先至知，教練諗住我一比賽完，就畀我加入國家隊，為呢件事，我喊足幾晚。

　　「呢個頭痛一路困擾住我，我惟有繼續留廣東省打波，淨係一路做廣東第一，我都覺得自己好。」

　　一九七八年，許素虹來到香港發展，即橫掃香港乒壇。「我自細就好想世界第一，但知道自己唔得，退而求其次，希望可以打世界賽，企上頒獎台聽住奏國歌，點知入唔到中國國家隊，條路兜個圈香港，反而仲得到更多。」

　　　天外飛屍

　　南征北討的八十年代，許素虹打乒乓球的月薪，由九百元逐漸至有三千元，但始終不夠餬口，閒來會私人教授乒乓球幫補生活，只是所賺到的錢，全都耗盡在醫治偏頭痛方面。

　　「三十歲之前，我咩錢都用晒睇醫生，之後我就靠拎住五萬蚊去炒樓、炒股，我做人都幾狼，同打波一樣，我想贏就諗住進攻去搏，結果畀我賺到第一桶金（廿幾萬元），我就用筆錢去買層樓，用我間乒乓球訓練中心。

　　「果時好多人都話：『許素虹，你都三十歲啦，波又冇得打，錢又冇晒，都唔知你點樣生存？』我份人就係最鍾意人睇衰我，你愈睇死我，我就愈要做好畀你睇！

　　「我失敗過好多次，會好快彈番起身。我一遇到挫折，就會返屋企檢討自己，係咁諗諗諗，點都要諗計諗通佢，再諗唔掂就會去觀音廟同觀音傾偈，然後搵呂祖先師扶乩問卜。」

　　不由得許素虹不信奉神佛，只因去年她本應命喪於天外飛屍之下。

　　去年年頭她拜訪一名國內高人阿姑，阿姑指她年尾會有一個劫數，叫她三月起戴一粒觀音手的玉墜擋煞。

　　到了八月一日中午十二時許，她在屋企一樓平台如常教學生打波，忽然有一粒石仔從天而降打中其右手手指，令她下意識退後一步，不料再有大片石屎連同天花板跌下，她再向右彈開幾步。

　　一兩秒後，一名從廿一樓天台跳樓自殺的五十歲婦人，壓穿許的屋頂，跌正在她剛才站立的位置，嚇得她魂飛魄散。「好彩觀音保佑，好多人話我本應死啦，我覺得係天意。」

　　四十七歲，經歷的人生起伏，令她深明「做人最緊要開心，我最鍾意去dup骨，一次四粒鐘架，隔兩三日就敷一次面膜，我好貪靚架！」

　　記者說希望她穿裙拍照，她高興地說：「好呀！我真係要去買番條新裙先，嘩！日我都係全日唔食，瘦番先至上鏡！」

　　為了自己開心，她不時會買鑽石首飾送給自己。「每個月我一定會去shopping放鬆自己。年年暑假賺到錢，我又會買鑽石獎勵下自己。自己又鍾意儲，得閒拎出望抹，都唔知幾開心，同埋我五行水多，要買屬火，鑽石咪係火囉！」

　　

　　經歷兩次愛情重傷，許素虹已習慣一個人住，每晚回家，第一件事一定是開電視機：「我好怕靜，又驚悶，冇電視唔得口架！」夜冷風，有時她就在電視聲浪中一睡至天明。

　　「我由廿幾歲到四十歲一直好恨婚紗，我知媽媽好擔心我，好想我快結婚，驚我幾十歲人老冇伴，我同媽咪講：『或者呢個係我命數呢！』」

　　其實，許素虹還有一件心事尚未告訴媽媽，她始終念念牢記十多年前一個街頭相士的預言。「嘻嘻！佢話我○七年會有姻緣喎，唔知真定假呢？」

　　情是永遠迷，四十七歲的思春情懷，夢裡夢外總是詩，誰說不可以？

　　

　　富豪公子明星闊太想學乒乓球，第一個人想起的，一定是許素虹。她是連續七屆香港女單冠軍，代表香港南征北討立下不少戰功，退役後開學校教小朋友打波，高徒統統橫掃學界比賽，不少名校如華仁小學更搵她承包乒乓球校隊執教。

　　明星客仔有休息近一年的梁朝偉，每天都打乒乓球健身，許素虹說他只專注學正手抽擊，其他推擋削波一概不學。「佢目的係想練氣同反應，有冷氣都特登唔開，想焗一身汗keep fit；每次佢斟茶，都會專登拎杯茶埋，好有禮貌叫『教練飲茶』，走又親自送出門口搭車立。」

　　好人好事，她容易記在心上，只因悲天憾事，半輩子已遇上太多。

　　本是富商千金，卻因動亂落難成耕田孩童；本可進入中國國家隊，卻因頭痛頑疾含恨放棄；本以為遇上真命天子喬木可依，卻竟是爛賭鬼敗盡身家。

　　吹脹嗎？「我人生起伏好大，每一場波我都想贏，輸我會彈起身再搏過，要生存就要努力。」像乒乓球，跌在地上，卻彈得更高。

[ 本帖最後由 HKSpurs 於 2017-10-26 01:25 編輯 ]

作者: DGChan 時間: 2017-10-26 08:59

咁我信有很多好教練，我有朋友個仔係港島区南X學乒乓球就预到過講普通話專才教练，話我朋友兒女球拍不行，要換膠皮，話初學不用換新的換舊膠就得，重要話平啲比你，話本身400幾一塊，而家賣比你600兩塊，我朋友唔識就只好聽他，換出來大小不一，氣死他，预到這種教练大家点睇？

作者: lmichael 時間: 2017-10-26 09:14

萬達叫唔叫球館呢？係乒乓世界之前，恕我識野少，我真係唔知萬達張台，除左比人試板之外，仲比人教到波。許素紅個球館肯定後過乒乓世界。但佢次前，私人教，我就唔敢講了。。。

作者: GIN 時間: 2017-10-26 09:21

提示: 作者被禁止或刪除內容自動屏蔽

作者: DGChan 時間: 2017-10-26 10:01

但學界賽都唔見許XX去睇比赛，咁我都話我背後教了很多冠軍出來，又教很多名人明星

作者: mmfc821 時間: 2017-10-26 10:02

始終業界無一個好制度要大家遵守，教波搵食都係靠個信字

作者: HKSpurs 時間: 2017-10-26 10:36 標題: 2015年都市日報：哥哥舊愛秘撻嫩男

一代巨星張國榮（哥哥），不經不覺離世12年，其生前摯愛唐鶴德（唐唐），漸漸走出陰霾，重過新生活。據《e+娛樂》報道，月初剛度過57歲生日的唐唐，近日春風滿臉，全因他身邊出現一位密友，年約29歲的乒乓球教練區展翔。向來愛打羽毛球的唐唐，近日忽然愛上打乒乓球。他一星期會上球室三次，與「乒乓男」教練切磋球技，打起波來還十分肉緊，真是「啪啪」有聲。

據了解，兩人在朋友圈中認識，近來因為打波而經常見面。向來生活正規、又喜歡打波做運動的唐唐，跟對方志趣相投，一拍即合。早前《e+娛樂》就影到唐唐穿上運動外套和短褲，去到灣仔摩利臣山道「許素虹乒乓球訓練中心」，和「乒乓男」埋位切磋。據知，29歲的乒乓球教練區展翔，在該中心教乒乓球已有6年，教小朋友和成人團體班。知情者更向該周刊透露：「佢身形唔算高大威猛，都幾青靚白淨，仲成日一身名牌，睇落去都幾似哥哥。」

作者: HKSpurs 時間: 2017-10-26 10:41

許素虹乒乓球訓練中心係名人界圈子的確口碑好，很受歡迎的

名人界一定要找港隊學運動的，但又冇咩強求成績，故此港隊（真正一隊）退役的做教練都一定不憂

[ 本帖最後由 HKSpurs 於 2017-10-26 10:44 編輯 ]

作者: grizzlyhk 時間: 2017-10-26 11:00

引用:

原帖由 lmichael 於 2017-10-26 09:14 發表
萬達叫唔叫球館呢？係乒乓世界之前，恕我識野少，我真係唔知萬達張台，除左比人試板之外，仲比人教到波。許素紅個球館肯定後過乒乓世界。但佢次前，私人教，我就唔敢講了。。。

大概1994以前香港基本上好似得2間賣乒乓用品的，上萬達買東西很多時看到名人在教波。。。。

作者: 乒乓在線 時間: 2017-10-26 11:08

引用:

原帖由 HKSpurs 於 2017-10-26 10:36 發表
一代巨星張國榮（哥哥），不經不覺離世12年，其生前摯愛唐鶴德（唐唐），漸漸走出陰霾，重過新生活。據《e+娛樂》報道，月初剛度過57歲生日的唐唐，近日春風滿臉，全因他身邊出現一位密友，年約29歲的乒乓球教練區展 ...

有少少邪

作者: 速鳥 時間: 2017-10-26 11:21

呢個 topic 應該改為「乒乓娛樂圈」

作者: 苹果 時間: 2017-10-26 11:48 標題: 回復 9# 的帖子

那種教練都有，換舊膠皮600兩块

，做膠皮生意咩⋯⋯

作者: lmichael 時間: 2017-10-26 11:55

引用:

原帖由 grizzlyhk 於 2017-10-26 11:00 發表

大概1994以前香港基本上好似得2間賣乒乓用品的，上萬達買東西很多時看到名人在教波。。。。

我由1982年開始去萬達買野,當年真係得一間,鄭生檔野係後期少少,其實你講係萬達教,唔係指個張台吧? 真係點教?

作者: lmichael 時間: 2017-10-26 12:03

當年,乒乓球突然係2003,4年開始搵到食, 其中一個原因,係因為陰質教育基本,再加一生一體藝政策,就咁,好多學校要搞體藝,有咩野運動,地方少,安全,唔易受傷,又叫普及,可以係學校搞,唔駛BOOK場,型像有健康?就係乒乓球啦.

由學校帶隊,到引仰到私鐘既產業,真係好養活好多人. 所以我成日講, 大家唔好投訴乒總咁多, 好好維護呢個運動,個個都係乒乓球村既村民, 整臭呢個圈,個個擲件垃圾出來,條村無人入來住,一定影響到每一位村民.

作者: 金擇魚 時間: 2017-10-26 12:08

引用:

原帖由 lmichael 於 2017-10-26 09:14 發表
萬達叫唔叫球館呢？係乒乓世界之前，恕我識野少，我真係唔知萬達張台，除左比人試板之外，仲比人教到波。許素個球館肯定後過乒乓世界。但佢次前，私人教，我就唔敢講了。。。

萬達,金運樂,我都見過有人教波,不過唔係教波為主,主要銷售乒乓用品

乒乓世界2000年開業,新場2001年開業,一年多就結業,同期有奪標,係工廠大廈

之前係香港星,後改名新港星,許素虹個舊場(樓上有人跳樓)至轉新場.佢D班多數係南華會開

奪標係參考藝昇開係工廈,而藝昇就聯誼會模式.藝昇之前有D球室兼營桌球....

如果以大場館,多球台模式,乒乓世界係第一間.

[ 本帖最後由金擇魚於 2017-10-26 15:16 編輯 ]

作者: 金擇魚 時間: 2017-10-26 15:26

引用:

原帖由 DGChan 於 2017-10-26 08:59 發表
咁我信有很多好教練，我有朋友個仔係港島区南X學乒乓球就预到過講普通話專才教练，話我朋友兒女球拍不行，要換膠皮，話初學不用換新的換舊膠就得，重要話平啲比你，話本身400幾一塊，而家賣 ...

打班定私人
有小朋友話剩係打噴波機,教練就行來行去
舊膠咪送囉,仲要賣.

作者: DGChan 時間: 2017-10-26 22:08

金澤魚你都聽過！怪不得話打来打去一年多都無進步，他仲以為個仔無天份想放棄，点知出面換個教練試試後越打越好

作者: (=^x^=) 時間: 2017-10-26 23:39

we try to post all TT school in here ( all of them are free of charge)

作者: lmichael 時間: 2017-10-27 07:47

引用:

原帖由 金擇魚 於 2017-10-26 12:08 發表
萬達,金運樂,我都見過有人教波,不過唔係教波為主,主要銷售乒乓用品

乒乓世界2000年開業,新場2001年開業,一年多就結業,同期有奪標,係工廠大廈

之前係香港星,後改名新港星,許素虹個舊場(樓上有人跳樓)至轉新場.佢 ...

乒乓世界點會咁快執左？佢唔係工廈，係灣仔舊樓，我當年仲幫城大係仲度買野。

作者: 金擇魚 時間: 2017-10-27 12:32

引用:

原帖由 lmichael 於 2017-10-27 07:47 發表

乒乓世界點會咁快執左？佢唔係工廈，係灣仔舊樓，我當年仲幫城大係仲度買野。

天橋個間開左一年多就結業
後來搬左去軒尼詩道，
奪標係長沙灣工厦

作者: DGChan 時間: 2017-10-28 18:19

支持乒乓世界，加油，長者可報名嗎

作者: 金擇魚 時間: 2017-10-28 22:18

引用:

原帖由 DGChan 於 2017-10-28 18:19 發表
支持乒乓世界，加油，長者可報名嗎

冇年齡限制

歡迎光臨香港乒乓網 (http://hkttf.com/)