香港乒乓網 - Powered by Discuz! Board

標題: 正手拉波的學習旅程！ [打印本頁]

作者: Bluesky 時間: 2010-7-4 07:53 標題: 正手拉波的學習旅程！

要有進步, 先要退步 (02/05/2010)
http://www.hkttf.com/viewthread.php?tid=26695&extra=page%3D1

要有進步, 先要退步!

新的動作或打法是需要時間去練習的,
在過渡期, 你會因改變了平日的動作或打法導致打波能力倒退!

我最怕在這段日子看你練習,

怕看你打失波, 打出界, 打落網而忟憎!

既然改變是你自己選擇的,
你就要有心理準備去接受改變期間的苦惱!

須知, 龍蝦的一生, 要脫殼好幾次才能長成巨大的身軀!

正手拉波有一d d 進步 (09/05/2010)
http://www.hkttf.com/viewthread.php?tid=26887&extra=page%3D1

近期見你刻意練多咗d 正手拉波,
打分時又刻意用多 d 正手拉波去進攻 (有些波, 你本應是用橫打的)
拉波時, 波停留在拍膠面的時間好似長咗,
每次塊膠好似咬一下隻波, 才把它抛向前衝!
有實"鄭" 咗的感覺!
d+d 就變咗有d d 進步 la

正手進步, 反手退步 (14/05/2010)
http://www.hkttf.com/viewthread.php?tid=27053&extra=page%3D1

近期見你刻意練多咗d 正手拉波,所以 "正手" 明顯有進步

但反手相對練少咗, 又明顯退步

每星期, 你練波打波時間有限,
想兩者兼得, 真係有難度喎！
等暑假 la,
到時多d 時間打波,
睇下可唔可以:
正反手都可以同樣打好d !

睇你學波及打波局! (22/05/2010)
http://www.hkttf.com/viewthread.php?tid=27304&extra=page%3D1

昨日睇你學波及打波局!
打波局, 你和一位女的夾雙打, 打得幾好, 重赢咗幾局!

之后, 睇你學波, 又發覺你正手拉波動作變了。怪怪的!

回家比你睇返video,
你又話冇問題, 還說拉波動作幾好呀!

但我則覺得, 今次學波, 反手好咗, 正手又差咗,
睇你打波局就知 la, 反手的得分係多d (不計搓波及發球),
和上星期波局相反!

動作時好時壞, 好唔穩定!

講到自己成個乒乓高手咁 (23/05/2010)
http://www.hkttf.com/viewthread.php?tid=27339&extra=page%3D1

昨日睇兒子練波, 發覺他正手拉波動作又變返正常 la。

他回家后, 我問他 why。
他說他拉正手時, 回憶返一位高手曾對他的評語 , 自己再調整動作(一位網友看他拉波的 video 后,詳細指出數點要改善地方, 令我非常感動)

他還笑說: " 你昨日話我正手拉波動作怪, 今日又話變返正常, 講到自己成個乒乓波高手咁"

我說: "我不是高手, 但總能分別動作怪唔怪,
因為我睇過高手練波, 但要進一步講出問題所在, 就無能為力 la"

Blueskyson 的正手拉波動作係未成型,
當幾日冇打波, 一打返就開局打分,再加上開波前熱身掃波唔夠,
就會出現動作變型的問題 la

哈哈哈, 這全是 Bluesky Theory,
兒子睇到我這篇 blog,
肯定又會笑我的口吻 "講到自己成個乒乓波高手咁"

練正手拉波, 寸步難移! (30/05/2010)
http://www.hkttf.com/viewthread.php?tid=27592&extra=page%3D1&frombbs=1

昨晚,我冇去睇你練波,
你回家后告訴我, 今日練正手拉波有新體會,
覺得過往的引拍動作, 影響了那球前衝的力量,
好呀, 那就快去改吧 !
其實, 你的正手拉波動作未定型, 還在不斷改變,在完善中。

你這個月, 主要想改善正手拉波,
今天己30 號 la, 改善了的地方是有的,但只是很少,
真是寸步難移啊!

正手是主菜, 橫打是配菜 ! (05/06/2010)
http://www.hkttf.com/viewthread.php?tid=27875&extra=page%3D1

今日去睇兒子北體打波,
遇到網友 Sam,
他讚正在打分的 blueskyson,
橫打打得好。

多謝他的讚賞!

但我覺得橫打始終難與正手匹敵 (世上王皓只得一個),
blueskyson 正手若能發到全身的協力,
那力量最少是橫打的三倍 (哈哈哈, 只是我的感覺)
他也意識到這點,
現在正努力練正手,
正手是主菜, 橫打是配菜 !

正手拉波, 練到發火! (06/06/2010)
http://www.hkttf.com/viewthread.php?tid=27881&extra=page%3D1
昨晚睇你練波,
大部分時間練正手,
又練到發火, 忟憎,
把塊拍向上拋起, 接返,
好彩, 你不是把它扔落地!

(已練咗個幾月了! http://www.hkttf.com/viewthread.php?tid=27313&extra=page%3D1)

你突然問我有冇帶 camera,
你想我攝錄你正手拉波的動作。
可惜, 我冇帶,
唯有馬上回家拎機!
之后, 拍咗些 video,
睇片后, 你再自我調整動作!

我是了解你的心情,
你知那處出錯,
但不是每球都改到,打得滿意,
你對自己是有要求的, 所以心有火,發忟憎!

正如教練說, 有火是好的, 因為可見你着意去改,這團火是一種動力,
但要練好一個技術,
係需要時間呀,
到暑假的時侯,大把時間,
我有信心, 你可以達到你的目標--練好正手!
暫時忍耐下吧, 特別是在6月的大考日子!

正手練極都打唔好, 唔想練 la (03/07/2010)
http://www.hkttf.com/viewthread.php?tid=28805&extra=page%3D1

唉,問你點解只練橫打,
你話正手練來練去都打唔好, 唔想練 la

正手前衝弧圈真係好難,見你練咗幾個月, 都打唔好,
真係寸步難移!
不過, 我知這只是你一時的悔氣說話及行為,
遲 d 你又會練返正手的!

正手前衝弧圈的威力太大了,
是一定要掌握的技術,
你是知道的!

悔氣說話后, 又練返正手! (04/07)
http://www.hkttf.com/viewthread.php?tid=28805&extra=page%3D1
昨天, 又見你練返正手!
每次睇你側身拉正手前衝打失,
我都好想話你知, 點解會打失,
唉....無奈....
我都唔知你的動作那裡出錯!

近期, 你反手相對練多咗,
又比以前好咗,
特別是反手突然變方向和彈波,
用彈波呢下, 手指好痛,
哈哈哈, 你示範比我睇,點解會痛!

一點點改變, 一點點進步! (31/07)
http://www.hkttf.com/viewthread.php?tid=29760&extra=page%3D2

近期, blueskyson少打了波, 但打波的一點點改變, 帶來一 d d 進步:

1. 少了無謂的交义步, 有些球只用小併步即可

2. 正手拉波開始慢慢改用腰帶, 以前主要用手帶 (難改, 但改善中)!

3. 改變打球技術的組合, 現在,橫打要用來過度, 正手是主力, 用來取分,這最難改, 進步也最慢,
要時間, 在改善中

4. 練習接勁衝的波, 開始有 d 退縮, 可能怕比波打親, 之后, 接多咗, 就習慣了!

5. 執板、開波、搓波、打高球在原來的基礎上, 作出少少修正, 但出來的效果, 真不錯!

今日他打波 8 小時! (16/08)
http://www.hkttf.com/viewthread.php?tid=30338&extra=page%3D1

今早, 我到乒乓X 國, 請黃 Sir 幫 Blueskyson 在新 YEO 拍貼上新膠片,正手省狂飈 3 , 反手白金 soft。
回家時, 兒子已在北體打了 3 小時波!

今晚, 粉嶺乒村波局, 龍叔話有位小朋友高手到來切磋,
所以 Blueskyson 就約一位波友去試新球拍及新膠片 (省狂), 之前是 donic F1, 以準備今晚的切磋!
3小時, 打咗幾局 ( 7局 4), 哈哈哈, 掃波打了幾分鐘新拍, 不慣, 即用返舊拍打分! 唉.......

打完波, 食個麵包, 就去粉嶺乒村波局,
去到, 一見到那位來切磋的小朋友高手,
吃了一驚, 原來是他 (一位丙組上游的高手)
Blueskyson 知道他是誰, 但比賽還未對過,
當然, 又用返舊拍來和他分( 7局 4),
最后, Blueskyon 2:4 局輸了,
我覺得打得精彩!

很好的一次經驗!

是時后, 告別舊拍和 F1 了,
餘下的時間, 他就用新拍和新膠(省狂)繼續和其他波友打分!

有 d 誇張, 今日他打咗 8 小時波! ;sweat

正手 ok, 橫打就..... (28/08)
http://www.hkttf.com/viewthread.php?tid=30740&extra=page%3D1

新球板與舊球板同是 YEO, 但重量不同,
紅色膠是狂 3 , 用正手(以前是 Donic F1),反手仍是白金 soft.

近期, 你練波, 教練加強了你正手的訓練,
有些位置, 以前你一定用橫打的,
練習時都要用正手,
初時你很不習慣, 忘不了橫打,
教練講笑話再用橫打, 要罰錢!

我覺得你正手比以前好咗,
但教練話你還欠爆炸力!
昨天看你在北體打分,
正手 ok,
橫打就.....;sweat

忘不了的橫打! (29/08)
http://www.hkttf.com/viewthread.php?tid=30775&extra=page%3D1

昨天,看你在北體打分,
仍用了很多橫打, 比例遠超正手,

近期練波, 教練己加強了你正手的訓練,
有些位置, 以前你一定用橫打的,
練習時都要用正手,
訓練時, 基本上都可改到, 用正手多d,
但一打分, 就自然反應, 用返習慣的橫打!

誰知, 你不下定決心, 輸就輸 , 爭取在實戰(打分)用多d 正手,
把你新學的正手技巧用上,
你正手將難有大進步!

另一方面, 橫打你練少咗,己打差咗,
到時, 兩頭唔到岸,
正手反手都唔得!;sweat

哈哈哈, 糾枉必須過正,
以后打分, 唔准你用橫打!

不過, 你都唔會聽我講架 la !;sweat

正手進步未能補償橫打退步 (29/08)
http://www.hkttf.com/viewthread.php?tid=30792&extra=page%3D1

今晚,看你在粉嶺乒村打分,
仍用了很多橫打, 比例遠超正手(現正在調整技術組合,正手要做"主菜")
真係如我所料,
橫打你練少咗,打失的球明顯多咗,
正手的少少進步,
未能補償橫打的退步,
所以見你今晚打得幾忟憎;sweat

今晚, 你對上次那位到乒村切磋的小朋友,
都係輸 ,輸2:3局!
賽果正常, 因為他始終都是高你一斑!

哈哈哈, 最后你走咗去打雙打, relax 下。

正手拉波冇質量! (02/09)
http://www.hkttf.com/viewthread.php?tid=30895&extra=page%3D1

已計不清, 你練了幾多個月正手拉波,
表面上, 近期姿勢靚咗,
看似勁左(睇你打分的表現),
這只是我的感覺,
但在教練眼中,則是另一回事!

教練話你正手拉波冇質量,
用到轉腰時,就冇摺前臂,
有摺前臂, 就冇轉腰,
重要的, 做唔到拍接觸到波前, 特然加速的爆炸力,
所以, 正手拉波冇質量!;sweat

你都同意教練的評語,
好, 就比心機練 la,
知恥近乎勇!

不論何種來球. 即使下旋球, 你每次拉波都是打"快點"
點解要增加自己拉失的風險,
唔打慢點,
希望你可以改變這習慣, 減少拉失波!

哈哈哈,上次學波, 教練和你打分時,
話你打波用多咗腦去思考, 變化比之前多咗 d d,

哈哈哈, 即是話你之前打波唔用腦, 太死扳呀!

今日聽你講打乒乓波! (04/09)
http://www.hkttf.com/viewthread.php?tid=30944&extra=page%3D1

今日冇去睇 blueskyson打波,
但他回家后, 高興地講返我聽今日波局的情況。

哈哈哈, 原來他今日打出了幾下好球!

有幾球正手拉波, blueskyson覺得拉得很好, 發到力,還示範比我睇。
見他的動作, 我就明白了,
他撲過去時已開始轉腰, 到位時再向前收前臂拉球, 所以腰手力齊發, 力量大咗!
好多時, 見他拉這些球會有力d,
但練習時, 連續拉球, 就差d,
我都唔知點解!

又有一球好球, 是接下旋短台, 他手勢是搓下去的,
但突然轉手, 用腕力把球拉起, 去對方大斜角!

不過, 反手真係差咗, 有好多球拉失,
但拉到的, 就有威脅性,
因他用球拍近邊處去接觸球,從那處開始磨擦, 所以球和膠皮的磨擦時間較長,旋咗!
但拉失的機會就大咗, 因為易撞拍邊 (相對用球拍中間去接觸球開始磨擦)!

我樂意聽他的分享!

突破好似突然來臨的 (05/09)
http://www.hkttf.com/viewthread.php?tid=30958&extra=page%3D1

今晚, 見 Blueskyson 在粉嶺乒村波局, 有一突破!

打分時, 9成用正手:
發球搶攻, 或搓波過渡,  就起手拉波,
過來的球, 長台也好, 短台也好, 照拉 (可能是前衝, 或高吊或側旋),
拉失了,有時會聽到他自言自語的檢討語:
還原唔夠快、摺臂呀、腳未到位, 猶疑咗.....

奇怪,橫打好似突然消失了,
正手拉波已變為主要攻擊得分手段,
又得喎,
突破好似突然來臨的, 事前毫無跡象!

備注(Sept 7,2010):
其實, 我所講的突破是指 blueskyson 打分時,用正手和反手的比例有突破, 現在是9:1 , 以前是3:7.
不是指他正手拉波質量有突破,雖有少少進步, 但距離目標還很遠呢!

又黎 la, 他越打越忟! (08/09)
http://www.hkttf.com/viewthread.php?tid=31032&extra=page%3D1

上一堂兒子學波, 反手打得很差, .
應是近期較集中練正手, 少練反手所引致的!

一球打失, 兩球打失, 第三球又打失, 有冇攪錯, ;sweat
這些球, 以前是輕易打到的, 甚至可以說得分的殺手鐧,
現在竟變成失分的負累,
又黎la, 他越打越忟! ;sweat

我繼續執波, 聽到教練對他的開解:

“幾球打失就忟 ,忟就繼續打失, 你要諗下點解打失, 可暫時唔好去到盡, 發晒力, 先減低少少質量, 令自己不要再打失,慢慢得返手感。平時打分或比賽, 都可能出現此問題的,自己要識得盡快調整心態, 控制情緒, 令自己可即場打返好 !"

教練是一位年青人, 應打過不少比賽,此乃他經驗之談!

哈哈哈, 那时候, 我想:

教練小時后是否也有 blueskyson現在的問題呢!

他是否從他的學生blueskyson 身上看到自己昔日的影子呢!

哈哈哈, 不知道!

練得多, 就會熟能生巧的! (12/09)
http://www.hkttf.com/viewthread.php?tid=31127&extra=page%3D1

今日,係北體睇你打波,
見你係咁發球搶攻, 係咁正手拉波,
不理能否成功!
今日你主要同兩位波友打分,
一位用反貼, 另一位用粒仔,
對完反貼對粒仔, , 之后再對反貼, 再對粒仔....
所以拉波調整要開!

好呀, 就咁練 la,
係不同位置, 用拉波還擊不同旋轉的來球,
練得多, 就會熟能生巧的!

旅程 To Be Continued.......

[ 本帖最後由 Bluesky 於 2010-9-13 15:40 編輯 ]

作者: thomastse813 時間: 2010-7-4 09:51

add oil ar LEVEL UP UP UP

作者: 儍峰 時間: 2010-7-4 10:44

龍蝦的一生, 要脫殼好幾次才能長成巨大的身軀!
我真系好鍾意呢句

作者: Joe 時間: 2010-7-4 11:03

不論正手反手都要用年月堆積返黎，比D耐心。起碼2-3年先有小成。

作者: Bluesky 時間: 2010-7-4 15:14

引用:

原帖由 thomastse813 於 2010-7-4 09:51 發表
add oil ar LEVEL UP UP UP

Thanks thomastse813

作者: Bluesky 時間: 2010-7-4 15:15

引用:

原帖由 Joe 於 2010-7-4 11:03 發表
不論正手反手都要用年月堆積返黎，比D耐心。起碼2-3年先有小成。

明白, 謝謝你對小兒的鼓勵

作者: Bluesky 時間: 2010-7-4 15:16

引用:

原帖由儍峰於 2010-7-4 10:44 發表
龍蝦的一生, 要脫殼好幾次才能長成巨大的身軀!
我真系好鍾意呢句

Glad you like it

作者: Bluesky 時間: 2010-9-13 15:43

Updated :

02/05/2010- 12/09/2010 的 正手拉波的學習旅程！

歡迎光臨香港乒乓網 (http://hkttf.com/)