Jimmy乒球日記之擺了大烏龍
是日又打波。本來早上打,點知因工作關係,臨時冇得打,由於係我租場,都要去一去簽個名,幫球友拎場,忍唔住著住恤衫打咗5分鐘,好在之後都冇遲到。
既然早上冇得打,咁收工打,報了歌街某球局,預計只可以打後段,結果OT,再遲多15分鐘先到,已經又係飯都唔食。今晚歌街4樓都滿哂,天氣凍,仲咁多人夜媽媽打波,有幾枱係初階級女將,另一邊也有教練上堂,我認得一位係某女名校的校隊教練,基本上成日都見佢喺歌街打波,相信資深球友一定知他是誰
講返球局,首次來,竟然撞見兩位在港島區球局常見的球友,我仲同佢哋打了2次5局3勝,換了另一個場切磋,另有一番風味。這球局值得一讚係,練習多球也全用双魚三星V40+,成4元粒,打3個鐘,4枱12人,只係收40元,9點後來只收30元,真係好抵,這球局D人都好有禮貌又好球品,值得推介~
講咗咁多,究竟我「擺咗咩烏龍」呢?
話説我大半年前喺論壇見有人發帖,徵球友練習,小弟推薦PM,但大家一直夾唔到時間打番場,呢位球友話打長膠削球,也講明不打分,我成日都想會一會削球手,而呢大半年,偶爾會分享下練波的苦與樂,大致係互相鼓勵下咁。今晚佢話會嚟,我笑説一定要打返場,仲問定佢著咩色衫,有咩特徵。去到,我在指定4枱周圍望,見兩位師兄係嗰隻色衫,相信一定係其中一位,點知揮咗幾次手,對方都冇反應,隨時D人以為我係傻嘅。。。點知打打下,離遠有位師妹同我揮手。。。原來佢係女的。。。我真係擺了大烏龍。。。哈,結果同3位球友打了3場後,我去揾呢位女球友練咗大概15分鐘,最尾我用「詭計」,找來另兩位球友一起打混雙,打破了這位女球友參加球局不打分的齋砵。很有趣!!!
