今早7度,打破入冬以來最凍紀錄,返工前又去練波
今日去摩士,2人1枱2小時,先講下呢個場,聽聞好多球友都唔鍾意呢個場,覺得係台上僭建出來,唔係正規乒室,其實我又好鍾意
地理位置上,由樂富地鐵站行去,只係5分鐘,出入好方便。
環境方面,深度同闊度適中,同埋夠空曠,起碼唔會好似壁球室咁大回音,傾偈好清晰,光線又充足,有落地網,包保唔會好似歌街咁成日飛去隔離要勞煩人幫手執波,光線又充足,最重要係有時望下台下D人打羽毛球,風光明媚,遇著打籃球比賽,又氣氛十足,小休或輪下一round時望下,人都醒神D
不過球友要留意,2號枱好D,如果可以盡量租2號,因為1號有條梯,多隙,執波麻煩D
講返練習,噚日聽完女球友教,今日再練正手來回,仲未掌握到,成日提自己唔夠吊住隻手,已經好咗少少,但球仲係飛來飛去,唔夠定,同埋打得十幾分鐘,手臂會累,應該仲係姿勢錯,
另外,我要特別鳴謝陪練的球友A先生,通常之前一晚Whatapps佢,一叫就到,仲唔嫌棄我打長膠,我哋一般會1/3時間打反膠,1/3時間打長膠,另1/3時間打分實戰,而A先生亦比我更勤力,差不多日日打,係乒乓場上其中一位我敬佩的人,冇佢,我我呢幾個月都唔會進步咁多。
明日有事,應該暫停一日打波
[ 本帖最後由 jimmych 於 2018-2-1 16:00 編輯 ]
