12星座做特首,HK會點??
作者: chungling 來源: 香港自由論壇首頁
白羊特首
一向拼勁十足，無論處理內部外部的工作都會快手快腳，絕對唔會出現議而不決的情況；對住外來勢力更加無畀，係個真真正正的強勢政府！不過同時亦都因為佢呢個特性，呢個特首有d一言堂，只有佢話事其他人冇乜得話事，而且佢要的唔係意見而係周邊的人配合！
金牛特首
呢個特首心地善良，行出來見街坊突然受歡迎，響好多政策上佢都能夠做到平衡各界的利益，係為和藹可親型的特首！至於要改善的地方係佢對外事務做法會較軟弱，而且佢唔係咁鍾意改變，就算對於一d過晒時冇乜用的政策，佢認為可免則免就唔好攪佢，佢仲有d專制添！
雙子特首
講到八面玲瓏，雙子特首認第2冇人敢認第1，同各界的關係雖然稱唔上係親密但一定都冇乜芥蒂，適應力又強，好多政策同批評佢就最叻四兩撥千斤，風趣幽默係個攪笑特首；不過講到施政佢成日會朝令夕改，跟住佢工作班馬仔都幾辛苦，請少個人，睇少陣佢都唔掂！
巨蟹特首
用「愛民如子」形容呢位特首就最適當，巨蟹特首真係好用心去愛各位市民，佢會用心聆聽大家的意見，對於弱勢社群的需要更加會盡力照顧，有呢位特首一早已經立例有最低工資囉！響政策方面呢位特首做到認真唔錯，不過講到社交手腕同應變呢？佢就認真差dd啦！
獅子特首
咪以為呢個特首剩係識得粉飾太平喎！其實佢的領導同用材的能力都比其他星座高明，佢會搵到最適當的人選響最適當部門工作！響佢管治底下社會一片歌舞昇平，不過響風光的背後有幾咁千瘡百孔呢……至於呢位特首最大的缺點係唔多能夠接受批評，好鬼要面仲有少少懶！
處女特首
另一位唔多接受到批評的特首係處女特首，你話佢錯，佢可以講返一百個理由係你膚淺至咁講；雖然佢唔畀人話得，但係其實佢做事好認真，而且又勤力，仲勁過d人煲online-game！不過講到底佢始終較難同人相處，無論係上司定下屬，所以佢絕對係個以能力取勝的特首！
天秤特首
無論係對住市民定係對住下屬，呢位特首都係笑笑口，當大家朋友咁樣看待，而且佢好放心將工作交畀人處理，係個好講平等的特首；不過！佢又唔及獅子特首咁有領導力，再加上本身份人較為猶豫不決同耳仔軟，所以最常見的問題係信錯下屬又討好唔到老細，攪到一鑊泡！
天蠍特首
要數工作能力強，天蠍特首肯定名列前茅，本身聰明、又有野心再加上夠晒深謀遠慮，對外對內都可以處理得好好，係個天生政治家的材料！當然針冇兩頭利，因為佢唔係咁信人，就算幫佢好多年都唔代表佢信任你，更咪講睇得通佢諗乜，呢位特首工作能力強但係鐵面冇情！
人馬特首
選出呢位特首有好有壞，好處係佢公正嚴明，響法律同管治上佢獎懲分明，絕對唔會姑息同包庇下屬，教育方面亦會做得好好；壞處係佢太過自由奔放，對於其他人的批評同意見永遠只會口頭接受態度照舊！另外佢非常鍾意外訪，一年都唔知有冇一半時間坐響辦公室工作！
山羊特首
可能你會認為呢個特首實在係太死板；可能你會認為呢個特首實在太過嚴肅；可能你會認為呢個特首實在太過唔識得變通，不過你唔可以否定係呢位特首無論係佢的政治智慧、領導能力同忍耐力都比其他星座高，而且佢好鬼刻苦，隨時可以令財政儲備一年又一年創新高！
水瓶特首
想推行民主政制又或者想徹底改革社會，呢，揀呢位特首就最好，因為佢響12個星座入面係最重視民主同最接受到改變的理智型特首，不過要講民主你要先學習下接受佢唔鍾意按章出牌的特性，仲有係佢一d都唔怕輿論壓力，你有你講佢有佢用自己的方式工作，都幾激氣！
雙魚特首
老實講呢位特首係個老好人，佢心地善良又關心貧苦大眾，肯聽人講兼最易接受其他人的意見，仲有少少面懵心精添！不過以上的種種優點都未必可以抵償返佢d缺點，佢有卸膊傾向，冇乜承擔，又唔夠心狠手辣，鍾意逃避現實，最慘係不幸有事發生佢應變能力係零！
