46 123
發新話題
打印

分享小弟參與一場『專業聯盟乒乓球團體賽2017』的比賽經驗

分享小弟參與一場『專業聯盟乒乓球團體賽2017』的比賽經驗

甲、賽制

昨天星期日進行了一年一度的『專業聯盟乒乓球團體賽』,每隊打9局5勝,每場打3盤兩勝11分,用最新的雙魚V40+ 3星波。

乙、對手

對連續N屆冠軍勁旅(猜:歌手阿Lam某歌唱食物的專業團體隊),小弟代表(猜:689出身的專業團體隊),被派打男單,對手是橫拍正手反膠反手生膠粒仔打法,像港隊唐鵬的打法。對手比我年青力壯,高大威猛,N屆冠軍隊成員(註:N即係好多次咁解),特別是反手有生膠粒仔,小弟唔習慣粒仔的性能,並非純粹怕旋轉變化咁簡單,最害怕係粒仔打出的弧線和反彈唔同,又漂又沉,拉這樣特性的來球,好容易拉漏油,由於小弟平時甚少機會和粒仔較量,所以通常都係輸曬!(註:加上橫拍優勢論呢,我係直拍,對手係橫拍,有人會認為剩係呢樣嘢,我已經抵輸啦!) 綜合以上因素,這場比賽係實力縣殊的較量,我處於劣勢,對手明顯比我高兩班波,係6:4波。

丙、主旨

打比賽,勝負除了技術基本功及握拍方式(註:有人話握橫拍贏硬直拍啊!),也取決於臨場戰術的運用。我前天晚上星期六,一如既往的在深圳練波,練完之後,葉大明教練知道我明天要比賽,也知道我怕粒仔,臨別贈言了幾句對付粒仔的戰術給我徬下身。由於對手好勁揪,很有實力,比賽過程是當天最激烈的一場,值得作為賽後檢討的個案,小弟在此分享這場的比賽經驗給網友交流一下。

丁、比賽過程

返回比賽場地,小弟知道對方實力很強,不敢怠慢,也知道沒有退路,無論勝負如何,總之要全力以付。

我首先發球,教練昨晚提醒我,由於我怕粒仔的回球特性,而且以粒仔打法為主的球員,粒仔係強項,戰術係要避開對方的強項,所以戰術一:『儘量少回球到對方反手粒仔的位置』。我發短球到對方的正手近網位置,成功阻止了對方用反手粒仔彈擊我的發球,對方用正手的反膠回擺到我的反手近網位置,佢嘗試『以彼之道還於己身』的戰術回應我。

傳統上,直拍對於反手位不出台的近網短球,確實並非進攻的有效射程範圍,側身步法無法到位用正手搶攻這類反手短球,往往被迫放棄進攻,只能回擺或搓一個短球。不過,小弟也不是省油的燈,是有備而來的。對於這個反手位近網短球,我步法上前,身體前傾,手臂伸入台內,運用反面的反膠狂飈3-50去嘗試運用擰拉技術擰回對方中路追身正反手銜接位,對方唔能夠及時步法到位搶攻,只能用正手反膠勉強擋回我的斜線正手位,我立即運用步法跑到正手位搶衝回對方的斜線正手位,我成功衝穿了他。第二球,我運用相同戰術,照樣發短球到對方的正手近網位置,對方仍然用正手的反膠回擺到我的反手近網位置,小弟繼續運用反手台內擰拉技術,可惜今次對手有備而來,側身用正手快帶回我的正手小三角位置,我步法不到位,就失誤了。不過,咁都好,1:1冇蝕底。

輪到對方發球,佢發到我正手位近網位置,可能佢知道我反手可以擰拉短球,所以發正手位試探我正手短球的處理能力,我步法上前,身體前傾,手臂伸入台內,運用正面的反膠狂飈3去嘗試運用挑打技術回對方斜線正手近網位置,對方被我調動到正手位,匆忙中拉加轉弧圈球斜線過渡回我的正手位,我立即運用反拉技術,可惜壓拍角度錯了,壓得太死,落了網。對手再次發球,今次發到我的中路追身正反手銜接位,可能他在剛才已經發現了我原來是屬於兩面進攻型的球員,所以今次運用針對兩面攻打法的弱點位戰術去令到我無論運用反手或是正手,都發唔到力進攻,由於沒有想過佢會咁醒目識得咁做,以為佢會照舊控制我反手位,今次心裡沒有預備好,所以步法沒有即時作出反應去移動身體,結果係反手唔到位,擰唔到,正手又唔到位,挑唔到,點算?情急之下,身體作出自然條件反射,竟然自動運用直拍的傳統技術,推擋去接招,由於對方發側上旋,啱曬啦,運用手腕及手指的力量,用推擋彈擊回到對方中路追身正反手銜接位,我用『以彼之道還於己身』的戰術回應佢,佢只能被動防守回一個半高球給我,我把握機會扣殺佢正手斜線,把分數追回2:2。舊技術並非毫無用處,只要適當地運用,也可以制勝的!

輪到我發球,由於雙方已經多次在台內近網位置交峰,我觀察到對方身體站得比較貼台,於是記起教練的第二個戰術,就是落點要有長短快慢變化,才能迫對手回長球給你發力用弧圈球搶拉,所以戰術二:『間中發一個急長球到到對方正手位偷襲對方』。這個急長球令到對方很狼狽,佢匆忙中後退,只能回一個慢高吊弧圈球給我的反手位,我運用反手橫拉技術反撕到他反手斜線大空檔,佢趕唔切回反手位運用粒仔彈擊我,所以被我拉穿了。我再發球,由於之前都是全部發到佢的正手直線位,今次改變一下落點到佢的反手位,試探對方的反手位粒仔可以用甚麼板斧去接招?於是記起教練的第三個戰術,就是對付粒仔的落點要夠長夠急,不可以發太多短下旋球,因為粒仔可以趕得切大力地拱你兩大角底線,調動你失位及來球好漂,影響你搶拉的時候容易漏油。又或者對方也可以用粒仔依舊擺回你近網位置,你就不能搶拉了,所以戰術三:『間中發一個急長球到對方反手位偷襲佢』。我發急下旋長球到對方反手位偷襲佢,不過,對方的反手粒仔攻擊長球的能力高,一板彈過來我的直線正手位,好彩佢彈落網,直係驚險,比分4:2領先。

輪到佢發球,今次佢改變戰術,發急長球偷襲我的正手位,我不習慣球速那麼快,拉球撞板邊失誤了。另外一球佢突然發一個正手位近網下旋短球,我上前挑打,可惜接觸個波的位置錯誤了,挑了落網,比分4:4。餘下的對戰都是拉据的,由於我進攻很急進,暫時未能完全適應對方發球的旋轉變化,失誤率一半一半,所以分數到了落後的8:10。

輪到我發球,心裡話比自己聽,今次要好好把握這兩個發球機會,若果錯失了,就會先輸一盤,對方係好有實力的對手,若果輸了第一盤,由於是打3盤兩勝11分,好難連續贏兩盤反敗為勝,於是一直苦思如何發好這兩個球?都唔知開乜好?突然腦海靈光一閃,記得在香港乒乓論壇曾經看見網友貼文轉載王皓的『皓令天下視頻』http://media.happypingpang.com/play/11457600002432.html王皓介紹自己的勾手發球,他的勾手發球有好多時係站在右邊正手位發到對方斜線正手位的,這是反傳統的做法!傳統的發球站位,以右手握拍計,通常都是站在左邊反手位發的,點解呢?因為傳統上,反手位係比較弱,不能發力進攻,所以通常都會發球的時候站在左邊反手位多一點,若果對手回球到反手位,側身幅度會比較少,容易發球後側身到反手位運用正手進攻。王皓有直拍橫打技術,所以不需要考慮側身用正手搶攻的問題,反手位本身是強項,所以站位可以有靈活的變化,一時站在左邊,一時又可以站在右邊,佢實戰經驗發現對手經常猜不透為何佢會站在右邊發球,因為甚少對手會這樣站位發球的,所以很不適應這個接發球線路,往往接得不好,給他機會左右開弓搶攻。

我於是照板煮碗,像雙打一樣,站在球台右邊發勾手式逆旋球,發一個慢的近網短側下旋球到對方斜線正手位。對方上前用正手挑打技術,挑了落網,可能是判斷錯誤了以為是純粹側旋,不知道是有下旋成份,因為我發這球的動作很有連貫性,偷偷地勾手磨擦了少少下旋的動作並不明顯。我發另一球依然採用相同落點,但今次改了發近網短側上旋球到對方斜線正手位,因為上次佢食了下旋落網,今次若果發完全相同落點及旋轉的球,恐怕已經無效,聖鬥士星矢格言:『相同的招數,對聖鬥士係無效既!』。由於是從右邊發斜線的勾手式逆旋側上旋球,球在空中飛行已經有拐彎的走勢,落台反彈後,拐彎向對方右側更厲害,對方再次上前嘗試運用正手挑打搶攻,點知今次眼光光的看見個波向右側拐彎漏掉了!

點解呢?因為原本已經係從右邊斜線過來,就算係無轉,個波落台反彈後都會以斜線方向彈向右側,加上個波帶有側上旋,向右拐彎的幅度更大,而且帶有上旋,落台反彈會有點突然加速(第二速) 的節奏變化,(註:乜唔係新的雙魚V40+ 3星波制造唔到旋轉咖咩?呢點小弟已經在先前另外的帖『測試雙魚ABS新材料一星波V40+』http://hkttf.com/viewthread.php?tid=88621&extra=page%3D1解釋過,若果磨擦得夠應,越過了磨擦門檻,也可以制造強烈旋轉的。)加上小弟係採用帶有黏性的反膠狂飈3發球,綜合這些因素,對方第一次接我這個發球,應該係估計唔到拐彎的幅度那麼厲害,超出了預算,才漏了油!終於追平10:10打dudce了!可能佢連續食左我兩個發球,比我從後追上,有點驚魂未定,所以我輕鬆連取兩分,在艱難中拿下了這寶貴的一盤,領先了對手。

到了第二盤,對方先發球,由於第一盤接過了佢所有類型的發球,已經適應了,所以接發球搶攻的失誤率大幅度下降,很快被我拉開了分數。不過,對方實力很強勁,有時候我發球發得不好,有點落點失準的時候,嘩,比佢一板正手爆衝我斜線正手位小三角拉穿了,執波都執唔切呀!又有時候我主動起板搶先上了手,連續進攻他,都衝唔穿佢,最後自己拉失。

分數終於到達了第二盤關鍵的10:8了,我分數只領先對方兩分,我心裡話比自己聽,今次要好好把握,若果處理得唔好,分分鐘比對手反超前,輸這盤的話,第三盤決勝會對自己極之不利,因為小弟當時已經感覺有點困倦,打左成日比賽,到了這個尾聲階段,體力開始到了臨界點,好似咸蛋超人心口亮了紅燈一樣。

心理狀況開始有點波動,好想贏這盤波,好想速戰速決,太過想贏,反而出現了『想贏怕輸的心理包袱』!點算好呢?輪到對方發球,對方今次好精,佢知道我台內近網短球能台內擰拉挑打,出台長球正反手都能直接搶衝,於是他發了一個剛剛出台與不出台之間的中路追身正反手銜接弱點位下旋球過來,由於我好心急想贏,搶攻的時候沒有冷靜的睇清楚來球的落點,魯莽地夾硬搶攻,步法沒有完全到位就出手搶拉了,結果就係拉漏油啦!

分數被對方追到10:9了,可能這場比賽比較刺激,而且大部份球台賽事完結了,場外有大量觀眾圍觀,被觀眾各為其主的呼叫聲驚醒了小弟,小弟冷靜下來深呼吸,在原地彈跳幾下熱身預備身體隨時可以快速步法跑動。對方終於再次發球,今次佢略為改變了落點,可能對方知道我係傳說中的聖鬥士啦(即是相同發球旋轉落點無效),而且知道直拍的反手橫拉威力始終不及正手,所以就發了一個下旋剛剛出台與不出台之間的球到我反手位,假設我會用反手橫拉搶先上手,由於是剛剛出台與不出台之間的球,落點好陰濕,若果處理得唔好,估計我唔係失誤,就係拉球質量低,佢發球後,我細心觀察,佢已經做好準備,後退了半步並且移動到自己的左邊(以為我會用反手拉斜線到他的反手位),預備用粒仔彈擊我的搶攻。我當時精神十分集中,鼓起勇氣,果斷地步法快速側身到反手位,身體迎前,運用正手弧圈球,手臂揮動入台內,整個身體速向前發力爆衝對方直線正手位,當時感覺自己步法很快,像閃電式的到位,手指感覺到膠皮已經很結實的包住個波打磨結合的擊球(今次終於沒有拉漏油了!),不過,手指也同一時間感覺到個波好重,應該係來球下旋好強烈(喂!邊個話雙魚V40+ 3星波無旋轉咖?),當時如箭在絃,唔理得咁多啦,我發盡全身的力,個波經過膠皮的打磨,終於要脫離膠皮,高速的衝向前方,看見個波高速衝向球網的關口距離,嘩,個波的飛行高度竟然和網頂白邊好貼呀,個波底部好像有少少低過網頂白邊,個波底部終於碰到了網頂白邊,雖然如此,個波好堅強,走勢凌厲,無懼球網的阻攔,球網不能阻止個波繼續向前飛,個波到達接近對方球台的正手位右邊及底線角位,聽見『達』的一聽,經過千辛萬苦,終於成功著陸了!對手果然是有實力的猛將,在這情況下,竟然還可以快速反應,再次步法跑動到正手位,試圖運用弧圈球技術,嘗試在中台反拉這個像箭的直線前衝弧圈球,說時遲,那時快,除了剛才聽到了『達』的一聽,接著也聽到了『平』的一聽,....................... 。球賽終於結束了!

戊、總結

這場比賽能夠險勝實力比自己高的對手,除了臨場戰術運用合宜,還有落後不放棄的精神,及關鍵的最後一個擦網球!

謝謝抽空閱讀,祝各位身體健康及球技進步!

John
2017年9月11日



[ 本帖最後由 fastloopattack 於 2017-9-12 17:18 編輯 ]
附件: 您所在的用戶組無法下載或查看附件
本帖最近評分記錄
  • 145 黑暗指數 +1 精品好帖 2017-9-12 23:13
  • (=^x^=) 黑暗指數 +100 2017-9-12 00:44
  • Minion 黑暗指數 +1 勁詳細!!! 2017-9-12 00:35
  • LaPooh 黑暗指數 +1 太詳細!! 2017-9-12 00:33
  • Kinkadefan 黑暗指數 +1 很詳細! 2017-9-12 00:32

TOP

利害好似講馬一樣

TOP

回復 1# 的帖子

描述得非常詳盡!
多謝快兄的分享!!
利害!!!

TOP


打咁多字,拍片好過啦.

TOP

樓主好勁呀!
不但球技高超
記性也很強呢
期待你繼續寫多d經歷給大家分享!

TOP

引用:
原帖由 1980252501 於 2017-9-11 11:54 PM 發表
利害好似講馬一樣
講波經當然要有娛樂性啦,唔想悶親讀者嘛!

TOP

花兄,好似好耐冇見你分享文章了!
欣賞你充滿耐性!
你要繼續努力呀
當我掌握好乒乓球基本功,便會捲土重來與大家一齊吹水!!!

TOP

引用:
原帖由 金擇魚 於 2017-9-12 12:03 AM 發表

打咁多字,拍片好過啦.
實當時係有拍攝比賽錄像的,對方球隊年年都有拍攝小弟和自己隊員作戰,小弟原本都想拍攝,不過,考慮到這賽事出場好密,又要經常轉球台,若果每場都拍攝,每次set腳架都幾煩 ,驚會影響比賽唔夠集中,反正看見友隊年年都咁鍾意拍攝我,所以自己就費事搞咁多嘢。

TOP

引用:
原帖由 Kinkadefan 於 2017-9-11 11:56 PM 發表
描述得非常詳盡!
多謝快兄的分享!!
利害!!!
謝謝支持!

TOP

NICE
幾個
......................

TOP

引用:
原帖由 Minion 於 2017-9-12 12:08 AM 發表
樓主好勁呀!
不但球技高超
記性也很強呢
期待你繼續寫多d經歷給大家分享!
謝謝支持! 其實對手好波過我,只是運氣唔夠,輸左個關鍵的擦網球比我!

TOP

引用:
原帖由 LaPooh 於 2017-9-12 12:14 AM 發表
花兄,好似好耐冇見你分享文章了!
欣賞你充滿耐性!
你要繼續努力呀
謝謝支持!小弟若果將來有空,會繼續出帖的。

TOP

引用:
原帖由 乒乓在線 於 2017-9-12 12:17 AM 發表
NICE
謝謝支持!

TOP

高質素會員
香港乒乓球論壇
電郵 : [email protected]
more ball games, more friends

我只有一件事,就是忘記背後,努力面前的,向著標竿直跑。腓三:14

TOP

回復 14# 的帖子

謝謝支持!

[ 本帖最後由 fastloopattack 於 2017-9-12 10:06 編輯 ]

TOP



fast兄偶然都會條件反射下用一下推擋

TOP

引用:
原帖由 (=^x^=) 於 2017-9-12 00:44 發表
高質素會員

TOP

引用:
原帖由 rckw 於 2017-9-12 09:18 AM 發表


fast兄偶然都會條件反射下用一下推擋
小弟起初學波係傳統直拍左推右攻打法,推擋跟咗我咁多年,就算現在新增了横打技術,偶然身體也會自然條件反射下用了推擋,其實中路來球,正反手發唔到力,有個盲點漏洞位,用推擋剛好填補了這個漏洞,今次推擋幫咗我解圍!

[ 本帖最後由 fastloopattack 於 2017-9-12 16:57 編輯 ]

TOP

一定係香港數一數二的高手

TOP

引用:
原帖由 超人 於 2017-9-12 10:27 AM 發表
一定係香港數一數二的高手
對手才是高手,小弟今次以戰術、堅持及關鍵的擦網球僥倖險勝而已。

TOP

 46 123
發新話題